اسلام آباد۔20اکتوبر(اے پی پی) سینیٹ دی قائمہ کمیٹی انسانی حقوق دی چیئرپرسن سینیٹر ثمینہ ممتاز زہری اتے وزیراعظم دی کوآرڈینیٹر موسمیاتی تبدیلی رومینہ خورشید عالم پاکستان اچ ماحولیاتی تبدیلی دی پالیسیاں اچ انسانی حقوق دے انضمام تے اتفاق کیتے۔ وزیراعظم دی کوآرڈینیٹر رومینہ خورشید نال ملاقات اچ ، سنیٹر ثمینہ زہری موسمیاتی انصاف دے ایجنڈے کوں ودھاوݨ تے ھک قاب عمل ایکشن پلان سانڳے سانجھے طور تے کم کرݨ تے اتفاق کیتے تاں جو اے ڳالھ یقینی بݨائی ونڄ سڳے جو موسمیاتی اقدامات نہ صرف ماحولیاتی مسئلیں کوں حل کرن بلکہ بلکہ موسمیاتی تبدیلیاں توں متاثر تھیوݨ آلی کمزور کمیونٹیز بالخصوص بلوچستان اچ موسمیاتی تبدیلی توں متاثر انسانی حقوق کوں وی برقرار رکھن۔سینیٹر ثمینہ ممتاز زہری وزیراعظم دی ماحولیاتی کوآرڈینیٹر نال ملاقات اچ ایں ڳالھ تے روشنی پاتی جو موسمیاتی تبدیلی دی پالیسی اچ انسانی حقوق کوں ضم کرݨ ایں ڳالھ کوں یقینی بݨاوݨ سانڳے ضروری اے جو موسمیاتی خطرات نال نبݨݨ سانڳے اقدامات موجودہ عدم مساوات اچ ودھارا نہ کرن یا بنیادی انسانی حقوق دی خلاف ورزی نہ کرن ۔انہاں مزید آکھیے آب و ہوا دی تبدیلی بنیادی انسانی حقوق کوں وی ‘نمایاں طور تے ضیان ݙیندی اے جیڑھا جو زندگی ، صحت، خوراک ، پاݨی تے انھاں اہم مسئلیں بارے ودھدی بیداری کوں ظاہر کریندی اے ۔سینیٹرثمینہ ممتاز زہری ݙسائے جو میں ذاتی طور تے یقین رکھیندی ہان جو مختلف مطالعات توں پتہ لڳدے جو ماحولیاتی خطرات دے انتظام دے ایکشن پلانز اچ انسانی حقوق دا نظم و نسق آب و ہوا دے بحران نال نبݨݨ سانڳے ھک زیادہ تے منصفانہ نقطہ نظر کوں ودھارا ݙیوݨ سانڳے ٻہوں اہم اے ، خاص طور تے وسائل توں محروم لوکاں تے بلوچستان دےپسماندہ علاقیں اچ متاثرہ کمیونٹیز سانڳے ٻہوں ضروری اے ، انھاں نشاندہی کیتی جو ملک دے جنوب مغربی حصے اچ ھک وݙا بنجر خطہ ہووݨ پاروں صوبہ بلوچستان اپݨی جغرافیائی خصوصیات، سماجی و اقتصادی چیلنج تے موجودہ ماحولیاتی دٻاؤ دے امتزاج پاروں موسمیاتی تبدیلیاں سانڳے خطرے توں ݙوچار اے ، انھاں آکھیے زراعت تے انحصار، پاݨی دی کمی، محدود اتے ناقص انفراسٹرکچر پاروں خطے دے مسئلے ودھ ڳئن جیڑھے اینکوں موسمیاتی خطریں، خاص طور تے پہاڑاں دی تباہی، طوفانی سیلاب، سائیکلون،قحط سالی، سطح سمندر دی بلندی ، گرمی دی ودھدی لہراں تے تکھے مینھ پاروں موسمیاتی خطرات کوں حساس بݨیندی اے ۔انھاں ایجھیاں حکمت عملیاں تے زور ݙتے جو موسمیاتی تبدیلی دے ایں اہم چیلنج دا مقابلہ کرݨ سانڳے مساوات اتے انصاف کوں ترجیح ݙیون تاں جو موسمیاتی تبدیلی دے منفی اثرات کوں گھٹ کیتا ونڄ سڳے تے ھک منصفانہ معاشرے کوں ودھارا ݙتا ونڄ سڳے ۔ ݙوجھے پاسے وزیراعظم دی کوآرڈینیٹر رومینہ خورشید عالم آکھیے موسمیاتی بحران جاری رہݨ توں انسانی حقوق دی ھک وسیع رینج متاثر تھیندی پئی اے جیں اچ زندگی دے حقوق، صحت، خوراک، صاف پاݨی اتے صفائی، پناہ گاہ تے صحت مند ماحول شامل ہن۔انہاں آکھیے آب و ہوا دی تبدیلی کوں انسانی حقوق دے مسئلے دے طور تے منیندے قومی موسمیاتی تبدیلی دی پالیسیاں اچ انسانی حقوق دی پالیسیاں کوں ضم کرݨ تے انھاں دے نفاذ کوں یقینی بݨاوݨ دے پاسے پہلا کلیدی اقدام ہوسی جیڑھا جو لوکاں تے برادریاں تے سماجی اتے اقتصادی اثرات کوں سامݨے رکھے ۔وزیر اعظم دی کوآرڈینیٹر رومینہ خورشید عالم سینیٹر ثمینہ ممتاز زہری کوں ماحولیاتی انصاف دے ہدف گھنݨ سانڳے آپݨے ہرممکن تعاون دا یقین ݙیوائے جو انسانی حقوق تے مبنی ماحولیاتی پالیسی اتے ایکشن پلانز کمزور کمیونٹیز دی مشاورت نال بݨائے ونڄن خاص طور تے اوکھے ویلھے صحتمند زندگی اتے ماحول سانڳے لوکاں دے انسانی حقوق گھنݨ اچ تلویں سطح تے عمل درآمد کیتا ونڄے
