اسلام آباد۔29اکتوبر(اے پی پی) ہیلپ ایج انٹرنیشنل ولوں بزرگاں دی ودھدی آبادی تے ایجزم ( عمر دی بنیاد تے تعصب) دے حوالے نال ہک ݙینھ ورکشاپ رکھی ڳئی جیندے اچ اسلام آباد توں تعلق رکھݨ آلے سینیئر صحافیاں دی وݙی تعداد شریک تھئی ۔۔ ورکشاپ اچ بزرگاں دے معاشرے دی تشکیل تے تعمیر اچ کردار دی تعریف کیتی ڳئی ۔پاکستان اچ ہیلپ ایج انٹرنیشنل دے ہیڈ آف پروگرامز شہزادو خاصخیلی آپدے لیکچر اچ بزرگاں کوں پیش آوݨ آلے وکھو وکھ چیلنجاں تے روشنی پاتی ۔ انھاں تفصیلی ݙسایا جو ہر طبقے اچ بزرگاں نال کیجھا رویہ رکھیا ویندا اے اتے ایندی وجہ توں بزرگ کیویں ” کلہیپے” دا شکار تھی ویندن ۔ انھاں آکھیا جے صحیح معنیاں اچ انسان آپدا خیال رکھے تاں آسانی نال 120 توں 150 سال تئیں جیندا رہ سگدے۔ جیندے کیتے انسان کوں آپدیاں کھاوݨ پیوݨ دیاں عاداتاں بدلݨیاں ہوسن ۔ انھاں بیا آکھیا جو پورے ملک اچ بزرگاں کیتے صرف ݙوں ڈاکٹر ان جڈاں جو ہک کروڑ بڈھڑے لوک ملک اچ وسدن ۔ ہیلپ ایج دے کمیونیکیشن افسر فیصل دایو ورکشاپ دے شرکاءکوں ݙسایا جو اساں آپدے بزرگاں دے حوالے نال آپدی سوچ تے احساسات کوں بدل سگدے ہاں ۔ ورکشاپ اچ شرکاء دے مختلف سوالاں دے جواب وی ݙتے ڳئن۔ ورکشاپ دے اخیر تے شرکاء اچ شیلڈز اتے سرٹیفکیٹ وی تقسیم کیتے ڳئین۔(ڈاکٹر سعدیہ کمال)
