صدرمملکت ڈاکٹر عارف علوی دی ایف بی آر کوں غیررجسٹرڈ چینی ڈیلرز کوں ٹیکس نیٹ اچ گھن آوݨ دی ہدایت

اسلام آباد۔25اپریل (اے پی پی):صدرمملکت ڈاکٹر عارف علوی ایف بی آر کوں غیر رجسٹرڈ چینی ڈیلرز کوں ٹیکس نیٹ اچ گھن آوݨ دی ہدایت کیتی اے ، انہاں ایف بی آر کوں 60 ݙینھ اچ جامع عملدرآمد رپورٹ وفاقی ٹیکس محتسب اچ جمع کراوݨ دی وی ہدایت کیتی اے ، سنوار کوں ایوان صدر دے پریس ونگ توں جاری بیان موجب صدر مملکت ڈاکٹر عارف علوی آکھیے جو ٹیکس وصولی ودھاوݨ کیتے چینی دے وݙے خریداراں تے غیر رجسٹرڈ ڈیلرز کوں ٹیکس نیٹ اچ گھن آیا ونڄے ، ایف بی آر کنے ڈیٹا دی دستیابی دے باوجود باری مقدار اچ کھنڈ دے خریدار ٹیکس نیٹ توں ٻہر ہن ، صدر مملکت آکھیے جو چینی دے غیر رجسٹرڈ خریدار ٹیکس ادائیگی دی قومی ذمہ واری ادا نی کریندے پئے ، صدر مملکت ایف بی آر دی وفاقی ٹیکس محتسب دی ہدایات دے خلاف درخواست مسترد کرݙتی۔ وفاقی ٹیکس محتسب پرائیویٹ شوگر ملز توں کھنڈ دے غیر رجسٹرڈ خریداراں کوں ٹیکس نیٹ اچ گھن آوݨ کیتے تحقیقات دا آغاز کیتا ہئی ۔ گزرییل چار سالاں اچ ملز مختلف غیر رجسٹرڈ خریداراں کوں 2.7 ارب روپے دی کھنڈ ݙتی ۔صرف ترائے خریداراں کنے قومی ٹیکس نمبر ہئی .

مضمون کا ماخذ : سشی ایکسپریس

متعلقہ مضامین