اسلام آباد۔25اکتوبر(اے پی پی) وفاقی وزیراطلاعات، نشریات، قومی ورثہ و ثقافت عطاءاللہ تارڑ آکھیے وزیراعظم دی بجلی دیاں قیمتاں گھٹاوݨ تے چنڳی توجہ اے ، فیول کاسٹ ایڈجسٹمنٹ دی مد اچ نیپرا ملک اچ 86 پیسے فی یونٹ بجلی دی قیمت گھٹائی اے ، پنج آئی پی پیز کوں بند کرݙتا ڳئے ، 8 مزید آئی پی پیز نال ول مذاکرات تھئے تے معاہدیں تے نظر ثانی کیتی ڳئی ، ایں حوالے نال قوم کوں وختی خوشخبری ملسی ۔ قومی اسمبلی اجلاس اچ ارکان قومی اسمبلی ابرار احمد، ملک شاکر بشیر اعوان اتے محترمہ آسیہ ناز تنولی دے کراؤ نوٹس تے ڳالھ کریندے وفاقی وزیر اطلاعات آکھیے نیپرا گزریل ݙینھ پورے ملک اچ 86 پیسے فی یونٹ بجلی دی قیمت گھٹائی اے ، اے کمی فیول پرائس ایڈجسٹمنٹ دی مد اچ کیتی ڳئی اے ، وزیراعظم شہباز شریف بجلی دیاں قیمتاں گھٹاوݨ تے توجہ ݙیندے پئن اڄوکے سال وفاقی حکومت ھک یونٹس توں 200 یونٹ تئیں بجلی استعمال کرݨ آلے صارفین سانڳے 50 ارب روپے جݙاں جو پنجاب حکومت 201 توں 500 یونٹس تئیں بجلی استعمال کرݨ آلے صارفین کوں 45 ارب روپے دی سبسڈی ݙتی ۔ انھاں آکھیے ایں سبسڈی دے علاوہ ہر سال وفاقی حکومت 300 یونٹ تئیں بجلی استعمال کرݨ آلے کنزیومرز کوں 276 ارب روپے دی سبسڈی ݙیندی اے ، کے الیکٹرک کوں 174 ارب روپے دی سبسڈی ݙتی ویندی پئی اے ۔ وفاقی وزیر آکھیے لائف لائن تے نان لائف لائن کنزیومرز کوں سالانہ بنیاداں تے سبسڈی ݙتی ویندی اے ، اڄوکے سال صارفین کوں زیادہ سبسڈی ݙتی ڳئی پنج آئی پی پیز کوں بند کرݙتا ڳئے ایں توں معیشت کوں ارباں دا فیدہ تھیسی تے کپیسٹی پے منٹس گھٹ تھیسی ، جولائی توں ستمبر2024تئیں سبسڈی، فیول خرچے ، ایڈجسٹمنٹ تے پنج آئی پی پیز دے بند تھیوݨ توں بجلی دے ٻلاں تے وݙا فرق آئے ، انھاں آکھیے اٹھ مزید آئی پی پیز دی قوم کوں مزید خوشخبری ݙتی ویسی ، انھاں آئی پی پیز نال معاہدیں تے ول ڳالھ تھئی اے انھاں دے ریٹ گھٹ کیتے ڳئن جیں توں کئی سو ارب روپے دی بچت تھیسی۔ وفاقی وزیر آکھیے سیالے اچ بجلی دے ٻل گھٹ آندن اڳلے انھالے توں پہلے بجلی دیاں قیمتاں مزید گھٹ تھیسن، زرمبادلہ دے ذخیرے ودھ ڳئن ، سٹاک مارکیٹ نواں ریکارڈ بݨائے ، شرح سود اچ کمی آئی اے، معاشی اشاریئے مثبت ہن۔ اساں معاشی بحالی آلے پاسے ویندے پیوں ، بجلی دے معاملہ تے حکومت دی پوری توجہ ھے۔
