اسلام آباد۔21نومبر(اے پی پی)سینیٹ قائد ایوان سینٹر اسحاق ڈار آکھیے مسلم لیگ (ن) دی منشور کمیٹی کوں اٹھارویں ترمیم تے نظرثانی دی کوئی ہدایت نی کیتی ڳئی ۔ سینیٹ اجلاس اچ ڳالھ کریندے ہوئیں سینیٹر اسحاق ڈار آکھیے ھک خبر چھپی اے جو مسلم لیگ (ن) دی منشور کمیٹی کوں ہدایت کیتی ڳئی اے 18ویں ترمیم تے نظر ثانی کیتے غور کیتا ونڄے ، سینیٹر عرفان صدیقی منشور کمیٹی دے سربراہ ہن۔ انہاں ایں تے وضاحت کیتی اے جو 2008 توں 2013 دے دوران 18ویں ترمیم کیتے ٻہوں کم تھئے تے ایندے توں پہلے میثا ق جمہوریت تے وی پیپلز پارٹی اتے مسلم لیگ (ن) دستخط کیتے ہن ۔ انہاں آکھیے 1973ء توں 2008ءتئیں دے معاملات کوں سدھا کرݨ سانڳے ݙوہیں ایواناں تے مشتمل پارلیمانی کمیٹی سینٹر رضا ربانی دی سربراہی اچ بݨائی ڳئی جیں دے بعد اٹھارویں ترمیم دی منظوری ݙتی ڳئی ، این ایف سی ایوارڈ دے حصے دا وی تعین کیتا ڳیا ، کنکرنٹ لسٹ توں ٻہوں ساریاں چیزاں صوبیں کنے چلیاں ڳئن لیکن ݙیکھݨ دی ڳالھ اے ہے جو ہݨ صوبے ایں حوالے نال آپݨی ذمہ واری نبھیندے پئن یا کائناں ، حالانکہ مالی وسائل تاں انہاں کوں منتقل تھی ڳئن ۔ انہاں آکھیے اٹھارویں ترمیم توں کہیں کوں کوئی مسئلہ کائنی ۔صوبیں کوں انسانی وسائل دی ترقی کیتے آپݨیاں ذمہ واریاں پوریاں کرݨیاں چاہیدن۔
